प्रधानसेनापति र रक्षामन्त्री नआएपछि सुशासन समितिको बैठक स्थगित

काठमाडौँ । नेपाली सेना भित्र भएको र हुने गरेको भ्रष्टाचार बारे छलफल गर्न बोलाइएको संसद अन्तर्गत सुशासन तथा राज्यव्यवस्था समितिको बैठक प्रधानसेनापति तथा रक्षामन्त्री उपस्थित नभएपछि स्थगित भएको छ ।

सेनामा भ्रष्टाचार हुने गरेको उजुरी परेपछि त्यसबारे छलफल गर्न प्रधानसेनापति पूर्णचन्द्र थापा र रक्षामन्त्री ईश्वर पोखरेललाई समितिको बिहीबारको बैठकमा उपस्थित हुन भनिएको थियो । तर दुवैजना बैठकमा आएनन् ।

भ्रष्टाचारको गम्भीर आरोप रहेकाले प्रधानसेनापति तथा रक्षामन्त्रीको उपस्थितिमा छलफल गर्नु उपयुक्त हुने भन्दै सांसदहरुले बैठक स्थगित गर्न माग गरेका थिए । सांसदहरु कृष्णगोपाल श्रेष्ठ, झपट रावल, वृजेश कुमार गुप्तासहितले सेनाभित्रको भ्रष्टाचार बारे नेतृत्वसँगै बसेर छलफल गर्न उपयुक्त हुने भन्दै बैठक स्थागित गर्न माग गरेपछि सभापति शशी श्रेष्ठले स्थगित गरेकी हुन् ।

नेपाली सेनाका पूर्व प्रधानसेनापति राजेन्द्र क्षेत्रीले पदमा रहँदा भ्रष्टाचार गरी अकुत सम्पत्ति आर्जन गरेको उजुरी समितिमा परेको छ । सोही उजुरीपछि समितिले छलफलका लागि प्रधानसेनापति र रक्षामन्त्रीलाई बोलाएको थियो ।