साझा बसको यात्रा कोरोना भाइरसबाट बच्न सुरक्षित

काठमाडौं । काठमाडौं उपत्यकाका विभिन्न रुटमा सञ्चालन हुने साझा बसले आफ्ना यात्रुलाई कोरोना भाइरस संक्रमण नहोस् भनेर सुरक्षाको उपाय अपनाएको छ।

आफ्ना यात्रुको स्वास्थ्य सुरक्षाका लागि साझा यातायातले आफ्ना बसमा नियमित रूपमा कीटाणुनासक औषधि छर्किने तथा सरसफाइ गर्ने गरेको हो।

चार दिनदेखि आफ्ना सबै गाडी सञ्चलान गर्नुअघि राम्रोसँग सफा गरेर भाइरस मार्ने स्प्रे छर्किने गरेको साझा यातायातले जनाएको छ।

धेरै छोइने बसका सिट, ढोका, समात्ने डन्डी, झ्याललगायत हातले बढी छोइने भागमा सेनिटाइजर छर्किने गरिएको छ।

साथै बसका चालक तथा सहचालकलाई स्वास्थ्य परीक्षण गराएर मात्र काम गर्न दिइने गरिएको साझा यातायातले जनाएको छ।

यसै क्रममा मंगलबार बिहान पनि साझा यातायातले आफ्ना सबै गाडीहरु सफा गरेर मात्रै सञ्चालन गरेको छ।