विमानस्थलका एक्सरे टेक्निसियन ढकालविरुद्ध दुई करोड भ्रष्टाचार गरेको अभियोगमा मुद्दा दायर

काठमाडौँ । अख्तियार दुरुपयोग अनुसन्धान आयोगले त्रिभुवन विमानस्थल भन्सार कार्यालयका एक्सरे टेक्निसियन राजकुमार ढकालविरुद्ध दुई करोड भ्रष्टाचार गरेको अभियोगमा मुद्दा दायर गरेको छ।

ढकालले स्रोत नखुलेको सम्पत्ति आर्जन गरेको उजुरीका आधारमा गरिएको छानबिनबाट उनको व्ययभन्दा आय अस्वभाविक र अमिल्दो रहेको भन्दै आयोगले बुधबार विशेष अदालत काठमाडौँमा मुद्दा दायर गरेको हो।

उनको जीवनयापन स्तर आयस्रोतभन्दा उच्च देखिएको, विभिन्न बैंकमा रहेको खाताबाट अस्वभाविक रुपमा आयस्रोतभन्दा बढी रकम चेकमार्फत सापटी दिएको देखिएको पाइएपछि ढकालविरुद्ध दुई करोड दुई हजार आठ सय ४६ सम्पत्तिको वैद्य स्रोत खुल्न नसकेको दाबी अभियोग पत्रमा गरिएको आयोगका प्रवक्ता प्रदीपकुमार कोइरालाले जानकारी दिएका छन।

उनले अवैध आम्दानी श्रीमती निरजरा घिमिरे, राममणी लामिछानेको नाममा समेत राखेको अनुसन्धानबाट खुलेको छ। उनीहरुविरुद्ध पनि अवैध सम्पत्ति लुकाउन सहयोग गरेको अभियोगमा मुद्दा गरिएको छ।