विध्वंस स्वीकार हुँदैन, लोकतन्त्र र अभिव्यक्ति स्वतन्त्रताप्रति कांग्रेस प्रतिबद्ध छ : डा. प्रकाशशरण महत

काठमाडौं । नेपाली कांग्रेसका नेता तथा पूर्व अर्थमन्त्री डा. प्रकाशशरण महतले नेपाली कांग्रेस लोकतान्त्रिक मूल्य, मान्यता र अभिव्यक्ति स्वतन्त्रताप्रति दृढ रूपमा प्रतिबद्ध रहेको बताएका छन् । तर लोकतन्त्रको नाममा हुने विध्वंस र अराजकतालाई कांग्रेसले कहिल्यै स्वीकार नगर्ने स्पष्ट पारेका छन् ।

नेपाली कांग्रेस नुवाकोट जिल्ला कार्यसमितिले आयोजना गरेको संयुक्त चुनावी अन्तरक्रिया कार्यक्रमलाई सम्बोधन गर्दै नेता महतले पछिल्लो समय देशमा समाज बिथोल्ने र राष्ट्रलाई कमजोर बनाउने प्रयास भइरहेको बताए । उनले २४ गते भएको घटनालाई उदाहरण दिँदै त्यसलाई विध्वंसकारी कार्यको संज्ञा दिए ।

उनले भने, “समाज बिथोलिएको छ, देशलाई कमजोर बनाउने कोसिस भइरहेको छ । २४ गते विध्वंसकारी घटना भयो । अभिव्यक्ति स्वतन्त्रताको लागि लड्ने पार्टी नेपाली कांग्रेस नै हो । अरू कसले लड्छ ? हामी त्यसको पक्षमा सधैँ छौँ । तर विध्वंसलाई हामी कहिल्यै स्वीकार गर्दैनौँ ।”

डा. महतले देशलाई अस्थिरतातर्फ धकेल्ने गतिविधिले लोकतन्त्रलाई नै कमजोर बनाउने चेतावनी दिँदै कांग्रेस शान्ति, सहमति र निर्माणको पक्षमा रहेको उल्लेख गरे । उनले देशमा विकास निर्माणको नयाँ चरणको सुरुवात गर्न कांग्रेस प्रतिबद्ध रहेको बताए ।

कार्यक्रममा बोल्दै उनले विगतमा कांग्रेसले काम गर्न खोज्दा पटक–पटक अवरोध झेल्नुपरेको स्मरण गरे । “हामीलाई काम गर्नै दिएन । कहिले माओवादी हिंसा द्वन्द्वको नाममा दश वर्षभन्दा बढी देशले दुःख भोग्नुपर्‍यो । त्यसपछि फेरि नेपाली कांग्रेसकै नेतृत्वमा शान्ति स्थापना गर्‍यौँ, संविधान बनायौँ,” उनले भने ।

डा. महतले पछिल्लो समय ‘जेनजी’ को नाममा देखिएको आन्दोलनप्रति पनि आलोचना गरे । उनले वास्तविक नवयुवाहरू शान्ति, सुशासन र विकासको पक्षमा रहेको तर केही तत्व घुसेर आन्दोलनलाई गलत दिशामा लैजाने प्रयास गरिएको बताए ।

“तथाकथित जेनजीको नाममा केही गतिविधि भए । तर वास्तविक युवा सधैँ शान्ति, सुशासन र निर्माणको पक्षमा छन् । को–को कहाँ–कहाँबाट घुसेर आन्दोलनलाई बिथोलियो र विध्वंसको तस्बिर प्रस्तुत गरियो,” उनले भने ।

उनका अनुसार यस्ता गतिविधिले देशलाई धेरै वर्ष पछाडि धकेल्ने काम गरेको छ । डा. महतले आर्थिक विकास र पूर्वाधार निर्माणमा कांग्रेसको योगदान उल्लेख गर्दै आफू अर्थमन्त्री हुँदा नुवाकोट जिल्लाका लागि झन्डै ७ अर्ब रुपैयाँ बजेट विनियोजन गरिएको जानकारी पनि गराए ।

कार्यक्रममा सहभागी स्थानीय नेता तथा कार्यकर्ताहरूले नुवाकोटको विकास, रोजगारी सिर्जना र सुशासनका विषयमा कांग्रेसले स्पष्ट योजना अघि सार्नुपर्ने धारणा राखेका थिए ।