राप्रपा-राप्रपा नेपाल एकता पाँच महिनामै ‘अलपत्र’

काठमाडौं । राष्ट्रिय प्रजातन्त्र पार्टी (राप्रपा) र राप्रपा नेपालबीच गत पुसमा भएको पार्टी एकता पाँच महिना बित्न लाग्दा पनि प्रभावकारी रूपमा कार्यान्वयन हुन नसकेको भन्दै दुवै पक्षका नेताहरूबीच असन्तुष्टि बढ्न थालेको छ । तत्कालीन राप्रपा नेपालका अध्यक्ष कमल थापाले नै सार्वजनिक रूपमा पार्टी नेतृत्वको ध्यानाकर्षण गराउँदै एकता प्रक्रिया ‘अलपत्र’ परेको टिप्पणी गरेपछि विषय पुनः चर्चामा आएको हो ।

गत पुस १६ गते बलियो राष्ट्रवादी शक्ति निर्माण गर्ने उद्देश्यसहित राप्रपा अध्यक्ष राजेन्द्र लिङ्देन नेतृत्वको राप्रपा र कमल थापा नेतृत्वको राप्रपा नेपालबीच दुई बुँदे सहमतिका आधारमा एकीकरण भएको थियो । राप्रपाको महाधिवेशनमा अध्यक्ष पदमा राजेन्द्र लिङ्देनसँग पराजित भएपछि पार्टी छाडेर अलग्गै राजनीतिक यात्रा सुरु गर्नुभएका थापा करिब चार वर्षपछि पुनः राप्रपामै फर्किनुभएको थियो ।

तर, एकीकरण घोषणापछि अपेक्षाअनुसार संगठनात्मक समायोजन अघि बढ्न नसकेको भन्दै थापाले बिहीबार सामाजिक सञ्जाल फेसबुकमार्फत असन्तुष्टि सार्वजनिक गर्नुभएको हो । उहाँले पाँच महिना बित्न लाग्दासमेत स्थानीय तहदेखि केन्द्रीय संरचनासम्म समायोजन हुन नसकेको, भ्रातृ संगठनहरूको एकीकरण प्रक्रियासमेत रोकिएको तथा निर्वाचन आयोगमा पार्टी एकताको औपचारिक पत्रसमेत पठाउन नसकिएको उल्लेख गर्नुभएको छ ।

थापाले फेसबुकमा लेख्नुभएको छ, ‘बलियो राष्ट्रवादी शक्ति निर्माण गर्ने उद्देश्यका साथ दुई पार्टी एकीकरण भएको पाँच महिना बित्न लाग्दासमेत स्थानीय र केन्द्रीय तहमा समायोजन हुन सकेको छैन । भ्रातृ संगठनहरूको एकीकरण पनि अझै अलपत्र छ । यहाँसम्म कि निर्वाचन आयोगमा पार्टी एकताको औपचारिक पत्रसमेत पठाउन सकिएको छैन । यसले दुवै पार्टीका कार्यकर्ताहरूमा अन्योल र अनिश्चितता बढाएको छ ।’

उहाँले वर्तमान राजनीतिक परिस्थितिमा संघीय धर्मनिरपेक्ष गणतन्त्रको विकल्पका रूपमा हिन्दूराष्ट्र र राजसंस्थासहितको वैकल्पिक राष्ट्रवादी शक्तिको आवश्यकता झन् बढ्दै गएको दाबी गर्नुभएको छ । ‘यो वास्तविकतालाई दृष्टिगत गर्दै दुई पार्टी एकता गर्दा तय गरिएको अवधारणापत्रअनुसार अविलम्ब सबै तहमा समायोजन कार्य सम्पन्न गर्न राष्ट्रिय प्रजातन्त्र पार्टीको नेतृत्वसमक्ष हार्दिक ध्यानाकर्षण गराउँदछु’, थापाले उल्लेख गर्नुभएको छ ।

एकतापछि पनि अलग-अलग संरचना

एकीकरण घोषणा भए पनि व्यवहारमा दुवै पार्टीका धेरै संरचना अझै अलग–अलग रूपमा सक्रिय छन् । जिल्ला, प्रदेश तथा भ्रातृ संगठनहरूमा नेतृत्व बाँडफाँटको विषय टुंगिन नसक्दा कार्यकर्ता तहमा अन्योल बढेको नेताहरू बताउँछन् । विशेषगरी तत्कालीन राप्रपा नेपालका नेताहरूले आफूहरूलाई पार्टी संरचनामा उचित स्थान नदिइएको गुनासो गर्दै आएका छन् । कतिपय जिल्लामा समानान्तर गतिविधि भइरहेका छन् भने कतिपय ठाउँमा संगठन निष्क्रिय जस्तै बनेको अवस्था रहेको स्रोतको दाबी छ ।

राप्रपाभित्रै पनि एकता प्रक्रियालाई लिएर फरक-फरक धारणा देखिएका छन् । एक पक्षले संगठनात्मक व्यवस्थापन र पछिल्ला राजनीतिक गतिविधिका कारण ढिलाइ भएको तर्क गर्दै आएको छ भने अर्को पक्षले नेतृत्वले पर्याप्त प्राथमिकता नदिँदा प्रक्रिया रोकिएको आरोप लगाइरहेको छ ।हिमालय टाइम्स