काँग्रेस सांसद मोहम्मद आफताब आलम पक्राउ

काठमाण्डौ: नेपाली काँग्रेसका सांसद मोहम्मद आफताब आलम रौतहट स्थित आफ्नै घरबाट पक्राउ परेका छन् ।

प्रहरी प्रधान कार्यालय काठमाण्डौँबाट खटिएको प्रहरीको सादा पोशाकको टोलीले रौतहट क्षेत्र नं २ बाट निर्वाचित सांसद मोहम्मद आफताब आलमलाई राजपुरस्थित फरहदवा स्थित निवाशबाट आइतबार बिहान पक्राउ गरेको हो ।

सांसद आलममाथी २०६४ शालको संविधानसभा निर्वाचनमा बुथ क्याप्चर गर्ने उद्देश्यले निजकै रौतहटको राजपुर–४ खरहवामा रहेको घरमा बम बनाउन लाग्दा बिस्पोटबाट १३ जनाको मृत्यु भएको र प्रहरी पुग्दा सम्पूर्ण प्रमाण नष्ट गरेको आरोप लागेको छ ।

साथै उक्त घटनामा घाइते भएकालाई आलमको निर्देशनमा इँट्टा पोल्ने भट्टीमा हालेर मारिएको उनीमाथि गम्भिर आरोप रहेको बताइएको छ ।

घाइते भएपछि जलाइएका भनिएका दुईजना नेपाली युवाहरु त्रिलोकप्रताप सिंहका बाबु र कौशी अख्तर मियाकी आमाले आलममाथि कार्वाहीको माग गर्दै जिल्ला प्रहरी कार्यालयमा निवेदन दिएका थिए । तर, प्रहरीले आलमबिरुद्ध जाहेरी लिन नमानेपछि मृतकका अविभावकहरुले दोषीमाथिको जाहेरी निवेदन लिनुपर्ने माग गर्दै सर्वोच्च अदालतमा रिट दिएका थिए ।

सो रिटमाथि सुनुवाई गर्दै तत्कालीन न्यायाधीशद्वय सुशीला कार्की र भरतबहादुर कार्कीको संयुक्त इजलासले १६ जेठ २०६९ मा दोषी आरोपित आलमसहित ५ जनालाई गिरफ्तार गरी कारवाही प्रक्रिया अघि बढाउन आदेश दिएको थियो । अदालतको आदेश पछि पनि आलमलाई प्रहरीले पक्राउ गर्न सकेको थिएन ।