डा. प्रकाशशरण महत पहिलो पटक जन्मथलोबाट प्रत्यक्ष चुनावी मैदानमा

काठमाण्डौं ।

नुवाकोट क्षेत्र नम्बर १ को प्रतिनिधिसभा निर्वाचन यसपटक केवल उम्मेदवार चयनको प्रक्रिया मात्र नभई अनुभवी राष्ट्रिय नेतृत्वप्रति स्थानीय जनताको भरोसा कति गहिरो छ भन्ने महत्वपूर्ण परीक्षा बनेको छ । यही सन्दर्भमा नेपाली कांग्रेसबाट उम्मेदवार बनेका अनुभवी नेता डा. प्रकाशशरण महतप्रति स्थानीय मतदाताको चासो र अपेक्षा बढ्दै गएको देखिन्छ ।

ऊर्जा, परराष्ट्र तथा अर्थमन्त्रीको जिम्मेवारी सफलतापूर्वक सम्हालिसकेका डा. महत पहिलो पटक आफ्नै जन्मथलो नुवाकोटबाट प्रत्यक्ष निर्वाचनमा होमिएका हुन् । विद्यार्थी राजनीतिबाट राजनीतिक यात्रा सुरु गरेका उनी नेपाल विद्यार्थी संघका महामन्त्री हुँदै कांग्रेसको केन्द्रीय नेतृत्वमा स्थापित भएका अनुभवी नेता मानिन्छन् ।

समानुपातिक सांसद तथा विभिन्न महत्वपूर्ण मन्त्रालयको जिम्मेवारीमा रहँदा डा. महतले नीतिगत तहमा स्पष्ट पहिचान बनाएको कांग्रेस नेताहरूको भनाइ छ । ऊर्जा मन्त्रीका रूपमा विद्युत् उत्पादन, प्रसारण र पहुँच विस्तारमा खेलेको भूमिकालाई महत्वपूर्ण मानिन्छ भने अर्थमन्त्री हुँदा बजेट व्यवस्थापन, विकास प्राथमिकता र अर्थतन्त्र सुधारका विषयमा लिएको नेतृत्वलाई सकारात्मक रूपमा हेरिएको छ ।

प्रत्यक्ष निर्वाचनमा जानुअघि नै नुवाकोटसँग सम्बन्धित पूर्वाधार विकासका योजनामा पहल गर्दै उनले बालाजु–रानीपौवा र गगटे–गोल्फुभञ्ज्याङ सडकजस्ता महत्वपूर्ण परियोजनाका लागि बजेट सुनिश्चित गराएको बताइन्छ । यी योजनालाई नुवाकोटको दीर्घकालीन विकाससँग जोडेर हेरिएको छ ।

स्थानीयवासीहरूका अनुसार राष्ट्रिय नीति निर्माण तहमा अनुभव भएका नेताको प्रत्यक्ष प्रतिनिधित्वले जिल्लाको विकासले नयाँ गति लिन सक्ने अपेक्षा गरिएको छ । “केन्द्रमा प्रभाव राख्ने नेतृत्व भएमा नुवाकोटका योजना कागजमै सीमित हुँदैनन्,” स्थानीय मतदाताहरूको भनाइ छ ।

पार्टीभित्र एकताबद्ध समर्थन, लामो राजनीतिक अनुभव र नीतिगत योगदानका आधारमा डा. महतलाई नुवाकोट–१ मा जितका बलिया दावेदारका रूपमा हेरिएको छ । यो निर्वाचनलाई धेरैले नुवाकोटलाई विकाससँगै राष्ट्रिय नेतृत्वसँग थप मजबुत रूपमा जोड्ने अवसरका रूपमा लिएका छन् ।

राजनीतिक विश्लेषकहरूका अनुसार, यसपटकको चुनावमा मतदाताले नाराभन्दा अनुभव र परिणाम दिने नेतृत्वलाई प्राथमिकता दिने संकेत देखिएको छ । यही कारण नुवाकोट–१ मा डा. प्रकाशशरण महतको उम्मेदवारीलाई अर्थपूर्ण र प्रभावशाली रूपमा हेरिएको विश्लेषण गरिएको छ ।