संसदमा खोजी भइरहँदा सिंहदरबारमै थिए बालेन

काठमाडौं : प्रधानमन्त्री वालेन्द्र शाह उपस्थित हुनुपर्ने विपक्षी दलहरूको अडानले प्रतिनिधिसभाको बुधबारको बैठक चल्न सकेन । सभामुख डिपी अर्याल र सांसदहरूबीच पर्याप्त अन्तरक्रिया भए पनि संसद्को गाँठो फुकेन । सांसदहरूले खोजी गरिरहँदा प्रधानमन्त्री बालेन भने सिंहदरबारस्थित कार्यालयमै रहेको उनको सचिवालय स्रोतले बतायो ।

उनी संसद् बैठक सुरु हुनुअघि पार्टीको सचिवालय बैठकमा पनि गएनन् । मन्त्रिपरिषद् बैठक बस्यो । लगत्तै उनी मन्त्रालय गाभ्नेबारेको छलफलमा सहभागी भए । त्यसपछि खासै व्यस्त नरहेका प्रधानमन्त्री बालेनले निरन्तर अवरुद्ध संसद् बैठकमा जाने जाँगर भने देखाएनन् ।

सरकारको नीति तथा कार्यक्रममाथि छलफलका लागि प्रस्ताव टेबुल गर्ने र सांसदले उठाएका प्रश्नको जवाफ दिन उनले अर्थमन्त्री स्वर्णिम वाग्लेलाई अनुमति दिइसकेका थिए । विपक्षीले प्रधानमन्त्रीमाथि लगाएको संसद्प्रति उत्तरदायी नभएको आरोप उनले प्रधानमन्त्री तथा मन्त्रिपरिषद्को कार्यालयबाटै लाइभ हेरिरहेको स्रोत बताउँछ । ‘कुनै बिरामी वा विशेष कारणले भन्दा पनि अर्थमन्त्रीलाई जिम्मेवारी दिइसकेकाले प्रधानमन्त्री संसद् नजानुभएको हो,’ सचिवालय स्रोतले भन्यो ।

प्रधानमन्त्री जवाफ दिन उपस्थित नभए बिहीबार पनि संसद् चल्न नदिने रणनीतिमा विपक्षी दलहरू छन् । प्रधानमन्त्री बालेन र रास्वपा विपक्षीलाई गलाएर नीति तथा कार्यक्रम पारित गर्ने पक्षमा छन् । यसले सत्ता र प्रतिपक्षबीच बर्खे अधिवेशनको सुरुमै तनावको स्थिति आउने देखिएको छ । सभामुख अर्यालले प्रधानमन्त्रीलाई उपस्थित गराउन आफूले भेटेर संवाद गर्ने सदनलाई जानकारी गराएका छन् । त्यसको सन्देश बालेनको सचिवालयले प्राप्त गरे पनि बिहीबार उपस्थित हुने वा नहुने निर्णय दिइसकेको छैन । बालेन नीति तथा कार्यक्रममाथिको छलफलमा प्रधानमन्त्री उपस्थित हुनैपर्ने संसदीय अभ्यास तोड्ने मुडमा रहेको विश्वस्त स्रोत बताउँछ । मध्यान्ह दैनिकबाट