प्रधानमन्त्री शाह र राप्रपा अध्यक्ष लिङ्देनबीच भेटवार्ता

काठमाडौं । प्रधानमन्त्री वालेन्द्र शाह र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनबीच बिहीबार प्रधानमन्त्री तथा मन्त्रिपरिषद्को कार्यालय, सिंहदरबारमा भेटवार्ता भएको छ।

प्रधानमन्त्री शाह र अध्यक्ष लिङ्देनबीच मुलुकको समसामयिक राजनीतिक अवस्था, सरकार र प्रमुख राजनीतिक दलहरूबीचको समन्वय, राष्ट्रिय हितका विषय तथा वर्तमान राजनीतिक घटनाक्रमका बारेमा विस्तृत छलफल भएको प्रधानमन्त्री शाहको सचिवालयले जनाएको छ।

भेटमा देशको सुशासन, आर्थिक अवस्था, विकास निर्माणका कार्यलाई प्रभावकारी बनाउने उपाय, जनतासँग प्रत्यक्ष सरोकार राख्ने नीतिगत विषय तथा आगामी राजनीतिक सहकार्यका सम्भावनाबारे पनि विचार आदानप्रदान भएको स्रोतले जनाएको छ।

छलफलमा राष्ट्रिय प्रजातन्त्र पार्टीका अध्यक्ष राजेन्द्र लिङ्देनसँगै वरिष्ठ उपाध्यक्ष बुद्धिमान तामाङ र केन्द्रीय सदस्य खुस्बु ओली पनि सहभागी थिए। प्रधानमन्त्रीका तर्फबाट सचिवालयका केही अधिकारी उपस्थित रहेको जनाइएको छ।

प्रधानमन्त्री शाह र राप्रपा नेतृत्वबीच भएको यो भेटलाई पछिल्लो राजनीतिक परिवेशमा अर्थपूर्ण रूपमा हेरिएको छ। यद्यपि, भेटपछि कुनै औपचारिक सहमति वा निर्णय सार्वजनिक गरिएको छैन।

प्रधानमन्त्री शाहको सचिवालयका अनुसार यो भेट नियमित राजनीतिक संवादको एक हिस्सा हो र मुलुकका समसामयिक विषयमा विभिन्न राजनीतिक दलहरूसँग निरन्तर छलफल गर्ने सरकारको नीति अनुरूप भेटवार्ता गरिएको हो।