बाढीमा बेपत्ता पाँच न्यूजिल्याण्ड नागरिकको खोजी उच्च प्राथमिकतामा : प्रधानमन्त्री शाह

काठमाडौँ । प्रधानमन्त्री बालेन्द्र शाहले रसुवाको भोटेकोशी क्षेत्रमा आएको विनाशकारी बाढीपछि बेपत्ता भएका विदेशी नागरिकको खोजी कार्यलाई सरकारले उच्च प्राथमिकतामा राखेको बताउनुभएको छ।

शुक्रबार न्यूजिल्याण्डका प्रधानमन्त्री क्रिस्टोफर लक्सनसँग भएको टेलिफोन संवादका क्रममा प्रधानमन्त्री शाहले बाढीपछिको खोज तथा उद्धार, राहत र पुनःस्थापनाका लागि भइरहेका प्रयासबारे जानकारी गराउनुभएको हो। उहाँले विशेषगरी पाँच न्यूजिल्याण्ड नागरिकसहित बेपत्ता विदेशी नागरिकको खोजीमा भइरहेका प्रयासबारे समकक्षी लक्सनलाई अवगत गराउनुभयो।

वार्ताका क्रममा प्रधानमन्त्री शाहले नेपाललाई न्यूजिल्याण्ड सरकारले उपलब्ध गराएको २० लाख न्यूजिल्याण्ड डलर बराबरको मानवीय सहयोगप्रति धन्यवाद व्यक्त गर्नुभयो। साथै, जलवायु परिवर्तनका कारण नेपाल विपद्को उच्च जोखिममा रहेको उल्लेख गर्दै अन्तर्राष्ट्रिय मञ्चमा क्षति तथा नोक्सानीका लागि आवश्यक वित्तीय स्रोत जुटाउन न्यूजिल्याण्डको सहयोगको अपेक्षा व्यक्त गर्नुभयो।

न्यूजिल्याण्डका प्रधानमन्त्री लक्सनले भने नेपालमा आएको विनाशकारी बाढीबाट भएको मानवीय तथा भौतिक क्षतिप्रति दुःख व्यक्त गर्दै न्यूजिल्याण्ड सरकार र जनताको तर्फबाट नेपाली नागरिकप्रति समवेदना तथा ऐक्यबद्धता प्रकट गर्नुभयो।