सहमहामन्त्रीमा विजयी भएपछि बहादुरसिंह लामाले भने-प्रतिनिधिको विश्वासलाई कर्मबाट प्रमाणित गर्छु

काठमाडौं । नेपाली कांग्रेसको १५औँ महाधिवेशनबाट आदिवासी जनजाति सहमहामन्त्रीमा निर्वाचित बहादुरसिंह लामा तामाङले आफूलाई विश्वास गरेर विजयी गराउने महाधिवेशन प्रतिनिधिप्रति आभार व्यक्त गरेका छन्।

निर्वाचनमा प्राप्त मतलाई प्रतिनिधिहरूको विश्वास र भरोसाको प्रतिफलका रूपमा लिँदै लामाले पार्टीको एकता, संगठन सुदृढीकरण र रूपान्तरणका लागि इमानदारीपूर्वक काम गर्ने प्रतिबद्धता जनाएका हुन्।

विजयपछि आफ्नो धारणा सार्वजनिक गर्दै उनले प्राप्त जिम्मेवारीलाई व्यक्तिगत उपलब्धिमा मात्र सीमित नराखी पार्टी र संगठनको हितमा उपयोग गर्ने बताएका छन्। महाधिवेशन प्रतिनिधिहरूले आफूलाई दिएको विश्वासलाई व्यवहार र कर्मबाट प्रमाणित गर्ने उनको भनाइ छ।

लामाले पार्टीभित्र सबै पुस्ता, समुदाय र विचारलाई सम्मान गर्ने राजनीतिक संस्कार विकास गर्नुपर्नेमा जोड दिएका छन्। अग्रजको अनुभव र युवा पुस्ताको नवीन सोचलाई समेट्दै नेपाली कांग्रेसलाई थप सुदृढ, एकताबद्ध र समयअनुकूल बनाउन आफूले भूमिका खेल्ने प्रतिबद्धता व्यक्त गरेका छन्।

उनले पार्टीको संगठनात्मक संरचनालाई बलियो बनाउँदै कार्यकर्ताको भावना, योगदान र अपेक्षालाई सम्मान गर्ने वातावरण निर्माण गर्नुपर्ने आवश्यकता पनि औँल्याएका छन्।

सहमहामन्त्रीको जिम्मेवारीलाई अवसरसँगै चुनौतीका रूपमा लिँदै लामाले पार्टीको एकता कायम राख्न, संगठन विस्तार गर्न र रूपान्तरणको अभियानलाई प्रभावकारी बनाउन आफू सक्रिय रहने बताएका छन्।

महाधिवेशन प्रतिनिधिहरूको समर्थन र विश्वासप्रति पुनः आभार व्यक्त गर्दै उनले आगामी दिनमा आफ्नो काम र व्यवहारबाट जिम्मेवारीप्रतिको प्रतिबद्धता देखाउने बताएका छन्।