भाद्र २८, २०८३ आइतबार
September 13, 2026
न्युज डेस्क
२०७७ असार ९, मंगलबार
काठमाडौं । कोरोनाको महामारीमा विभिन्न देशमा अलपत्र परेर रहेका ६ हजार चार सय नेपाली स्वदेश फर्किएका छन् ।
सोमबारसम्म कुवेत, बहराइन, पाकिस्तान, बंगलादेश, जापान, अष्ट्रेलिया, दुबई, मलेसिया, म्यानमार, माल्दिभ्स, थाइल्यान्ड, सिंगापुर, साउदी अरेबिया, ओमन, अफगानिस्तानलगायत देशबाट ६ हजार चार सय ७९ जना नेपाल फर्किएका हुन् ।
उनीहरूलाई उपत्यकाका विभिन्न ठाउँमा निर्मित होल्डिङ सेन्टरमा स्वास्थ्य परीक्षण र तथ्यांक संकलनपछि क्वारेन्टाइन, होटेल क्वारेन्टाइन र सम्बन्धित जिल्लातर्फ पठाउने गरिएको छ ।
करिब तीन सयजना उपत्यकाभित्र रहेका विभिन्न होटेल क्वारेन्टाइनमा राखिएका छन् ।
आर्थिक हिसाबले सबल भएकाहरू भने होल्डिङ सेन्टरबाट सीधै होटेल क्वारेन्टाइनमा जाने गरेका छन् ।
बाँकीलाई स्थानीय तहले व्यवस्थापन गरेका क्वारेन्टाइनमा पठाउने गरिएको छ ।
नेपाली सेनाको उपत्यका पृतनाका अनुसार सोमबारसम्म होल्डिङ स्पेसमा आएकामध्ये प्रदेश १ का एक हजार तीन सय २३ रहेका छन् ।
त्यसैगरी प्रदेश २ का सात सय ७२, बागमती प्रदेशका दुई हजार दुई सय २१, गण्डकी प्रदेशका सात सय ७७ जना रहेका छन् ।
त्यसैगरी प्रदेश ५ का एक हजार ४८, कर्णाली प्रदेशका एक सय २२, सुदूरपश्चिम प्रदेशका एक सय ७७ जना रहेको नेपाली सेनाले जनाएको छ ।
विमानस्थलमा उत्रिएपछि उनीहरूलाई प्रदेशअनुसार होल्डिङ सेन्टरमा पुऱ्याइन्छ ।
‘संक्रमणको सम्भावना देखिएका र बिरामीसँग आएकाहरूलाई सीधै क्वारेन्टाइनमा राखेर कोरोना परीक्षण गरेर मात्रै जिल्ला पठाइन्छ,’ कर्णेल सानुकाजी थापाले भने, ‘बाँकीलाई होल्डिङ स्पेसमा दुई–तीन घन्टासम्म राखेर उनीहरूको रुचिअनुसार नै क्वारेन्टाइनमा पठाइरहेका छौँ ।’
सरकारले प्रदेश १ र २ लागि भक्तपुरमा, कर्णाली र सुदूरपश्चिम प्रदेशका लागि ललितपुरमा र अन्य प्रदेशका लागि काठमाडौंका विभिन्न पार्टी प्यालेसमा होल्डिङ सेन्टर बनाएको छ ।
प्रदेश १ लागि भक्तपुरको सूर्यविनायकस्थित इम्पेरियल बैंक्वेट र प्रदेश दुईका लागि राधेराधेस्थित हेरिटेज पार्टी प्यालेसमा होल्डिङ सेन्टर बनाइएको छ ।
यी दुवै पाँच–पाँच सय क्षमताका हुन् ।
यस्तै, ललितपुरको ग्वार्कोस्थित मण्डला पार्टी प्यालेसलाई कर्णाली र सुदूरपश्चिम प्रदेशका लागि होल्डिङ सेन्टर बनाइएको छ ।
महालक्ष्मीको डिभाइन पार्टी प्यालेस र धोबीघाटको सिद्धार्थ पार्टी प्यालेस पनि तयारी अवस्थामा छन् ।
यस्तै, काठमाडौंमा बागमती प्रदेशका लागि पानस र यती पार्टी प्यालेस, गण्डकी प्रदेशका लागि स्काई जोन र प्रदेश ५ का लागि मण्डला पार्टी प्यालेसलाई होल्डिङ सेन्टर बनाएको छ ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया